Ráðningarsamningar
Ráðningarsamningur lýsir starfinu og þeim kjörum sem starfsmaður og vinnuveitandi semja um. Hér finnur þú yfirlit yfir helstu atriði samningsins og leiðir til að hafa samband við SL.
Skylt er að ganga frá skriflegum ráðningarsamningi milli starfsmanns og forstöðumanns/vinnuveitanda við upphaf ráðningar. Frávik eru frá því ef starfsmaður er einungis ráðinn til eins mánaðar eða skemur eða ekki meira en átta klst. á viku.
Með því að taka skýrt fram í ráðningarsamningi hvaða reglur skuli gilda um ráðningarsamband, bæði varðandi starfið og þau kjör sem því fylgja er hægt að koma í veg fyrir ágreining síðar.
Í ráðningarsamningi eru m.a. tilgreind eftirfarandi atriði:
- Aðilar samnings: nöfn og kennitölur vinnuveitanda og starfsmanns
- Vinnustaður og heimilisfang vinnuveitanda (starfsstöð)
- Starfsheiti
- Vinnutími og starfshlutfall
- Upphafstími ráðningar og lengd ráðningar, sé hún tímabundin, ásamt uppsagnarfresti
- Ráðningarkjör, t.d. með tilvísun til launataxta og aðrar greiðslur
- Orlofsréttur
- Réttur til launa í veikindum
- Lífeyrissjóður sem greiða skal í
- Tilvísun til gildandi kjarasamnings og hlutaðeigandi stéttarfélags
Í öllum ráðningarsamningum þarf að koma fram hvaða kjarasamningur gildir um starfið. Þau atriði sem ekki koma fram í ráðningarsamningi, koma fram í miðlægum kjarasamningi.
Starfsmönnum er ávallt heimilt að skýra frá launakjörum sínum kjósi þeir svo að gera.
Þessi heimild hefur verið í lögum um jafna stöðu og jafnan rétt kvenna og karla síðan 2008.
Það þýðir að vinnuveitandi getur ekki krafist þess af starfsfólki sínu að það semji sig undir ákvæði um launaleynd. Slík samningsákvæði eru óheimil og hafa því ekki gildi.
Ráðningarsamningar eru staðlaðir hjá opinberum aðilum.
Reglur nr. 351/1996 um form ráðningarsamninga hjá ríkinu og skyldu til að upplýsa ríkisstarfsmenn um ráðningarkjör
Aðstoð Stéttarfélags lögfræðinga
Ef þú ert enn með spurningar sem ekki er svarað hér fyrir ofan hvetjum við þig til að hafa samband við skrifstofu félagsins.
Þú getur sent fyrirspurn, til dæmis varðandi almennar spurningar um vinnurétt og kjaramál.
Þú getur líka stofnað þjónustubeiðni sem fer sjálfkrafa inn í málaskrárkerfi okkar, til dæmis vegna umfangsmikilla eða viðkvæmra erinda.
Þú getur einnig óskað eftir símtali, ef þú heldur að það eigi betur við.
Þjónustuskrifstofa Stéttarfélags lögfræðinga er til húsa í Borgartúni 27. Hún er opin alla virka daga frá kl. 9-12 og 13-16. Síminn er 415 1650.